wůrdenn die Sachssen bewegt Hertzog wÿdekÿnt von Engernn zů
Yrem konig zůerwelen. Welcher Wÿdekÿnt ein haide wass
Jůng geraderr. grosse. grosleÿbig. behenderr. hende vnd sÿnn. vnnd ain
starcker mann. Aůch in schnellen vnd vnůersehen hendeln also getrost
vnnd bestendig das er allen Hertzogenn zů seinen gezeiten weit vorgieng
mit weÿsheit. mit gerůcht. mit redenhafftickait. vnd erfarůng der kriege.
Vnnd derhalbenn wirdig vnter den aller fůrnemsten herren zůerzelnn.
Vnd vnter den allertrefflichstenn konigen zůachtenn. Dann diser
konig Widekÿnt was ein so starckmůtig mann das er sein letzte crefft
gebraůchen wolt. ee er eÿnes anndern Folcks macht weichenn wolt.
Darůmb er aůch zům erstenn dem hailigen vnd grossen kaÿserr.
karll. hatt allein widerstanden. vnd darnach ain verbůntnÿs mit
den konigen vonn Dennemarck. von Friesen. Sorbenn vnd wendenn
gemacht. Vnd ist ein solcherr Fůrst gewest das er Dreÿssig gantze
Jharr mit hochbenantem grossen kaÿserr Karrll gekriegt hat. Der=
halben er sůnder zweiůell Sůnderlichs lobs vnnd preÿs hochwirdig ist.
Derhalbenn aůch nit wenigerr dann kaÿser karrll ist der Gros genant
wordenn. Wann es ist nicht vnbillich zůglawben das er
eÿnes ser grossenn gemůts vnnd rats gewest ist. Dÿweil er hat důrffen
die grosse macht des Allermechtigistenn vnd Sÿghafftigstenn kaÿser karll
důrffen verachten. Vnd mit ÿm krÿegen vnnd streiten vmb die sterck
vmb das VaterLanndt. vmb haws vnnd hoff. vmb kirchenn. vmb
weÿber vnd kÿnderr. Vnnd entlich aůch vmb das lebenn. Demnach
aůch nÿe kaÿner vnter allenn konigen kaÿser karrl soůil leÿds vnnd
verdrÿs als konig Wÿdekint ertzaigt hat. Dann konig wÿdekint
war vor seiner bekerůng ein vbergrÿmmigerr feÿndt vnd verfolgerr
des hailigen cristlichenn glawbens vnnd aller Cristglawbigenn.
Wiewol ÿn entlich der almechtig gleich als Sannt pawls aůs einem
reÿssenden wolff zů eÿnem gůtigenn lemblein. Vnd aůs ainem
grawsamen verfolgerr ein getrewen vnnd gestrengenn beschůtzer des
hailigenn Cristlichenn glawbens machet.