Diser Herr ist nachdem er ser hoch bewegt war. Das ÿm sein brůder
Fridrich erslagen was. mit heer in Sachssen gezcogenn. vnd vil schadens
darInn gethan. Derhalbenn ÿm der Gros hertzog
Otto. des Romischen konig. Hainrichs. des ersten Vater so vngnedig
wart. das er vor ÿm in Meÿssenn die zeit Delmancia genant flihen
můst. Inn welchem Lanndt er sich hielt. Derhalben hertzog
Otto vber die Meÿsner zcog. derwegen die Meÿsner die Vngernn
ÿn zůhelffenn in das Lanndt brachtenn.