Da diser Hertzog sich weltlicher vnnd eelicher ere. lůst. vnd gůter
ein zeit mit grossem glůck gebraůcht vnd genÿt hett. betrachtet er
entlich das alle ding aůff erdenn. aůsgenůmmen die lieb Gottes
vergenglich wernn. vnd beschlos die welt gentzlich zůůerlassenn.
vnd hinfůr allein dem Almechtigen trewlich zůdienen. Vnd
vergab in solcher maÿnůng seinem Eldisten Sůn das Regiment.
vnd Fůrstenthůmb. befal ÿm aůch darnebenn sein můtter vnd
brůdere mit allem vleÿs. Vnd zcog hinweg Inn ain
gewiltnÿs Got zůdienenn. Vnd nam nit mer mit ÿm dann
ain Esell. der ÿm sein blůnderlein trůg. Wiewol es der Fůrstÿn. den
Jůngen hertzogen seinen Sůn. seÿner ganntzen Ritterschafft vnd
Lanndtschafft entgegen war.