Nůn findt man das diser hailig Hertzog seÿ aůs Sachssen kůmmen
an das Stetlen Pregentz. welchs am anfang des Bodensees leydt.
Vnd vondannen důrch die Claůsen desselbigen Lanndts. die noch
hewtiges tags. die Claůsen der Marggrafschafft Chůrwalenn
wirt geheissen. zů ainem hohen gepÿrg zů eÿnem dorff das Ranck=
wiel heÿsset Daselbst gab sich sein Esell zům ersten
in die růhe. Vnd nachdem Sannt Gerolt meÿnet er solt
daselbst bleÿben. gab ÿm der Engell Gotes zůerkennen. das er
weiter solt zciehenn. vnd an dem ort bleÿben da der Esell zům
andernn mal wůrd růhen.