Der hailig Vater Gerolt folget des Engels gebot. vnd zcog an dem Stetlein
Feltkirchenn důrch Walgaw. zů dem hohen gepÿrg Inn ein ser
tůnckel verdornten vnd staÿnigen taln. zwischen verschneÿten. vber=
hohen bergen. Inn welchem tal ain schoner flůs fleůst. Daselbst
legt sich Sant Gerolts esell beÿ ainer grossenn schathafften eÿchen
nÿder. Vnd stelt sich mit allenn dingen also gegen dem hailigen
Vater das er daraůs kůnt abnemen das der Almechtig Got
ÿn an dem selbenn ort in seÿnem dinst vnnd lob haben wolt.
Dann wie Sannt Gerolt mit dem Esell vmbgieng kůnt er
ÿn doch Inn kaÿnn weg aůffbringen vnd anderswohin bewegenn.