zcornn erschreckt. als weren sie ser vonn ymannts verfolget worden. Solchen
schreckens vnd solcher flůcht verwůndert sich konig Wÿdekint ser vonn
seinem Folck. vnd nachdem er besorget es mocht grosser aůffrůr vnnd
enporůng in seÿnem heerr daraůs erwachssen folget er den fluchtigenn
nach vnnd hies sie still halden. vnd vermanet sie ernstlich zůbleÿben.
Vnd Saget. sie hettenn kaÿn widerwertickait oder anfechtůng zůbeferchten
von den feÿnden. warůmb sie doch flůgen. Vnd ÿrn konig also verliessen.
Da ym aber seÿn Folck kaÿn sůnderlich antwort gab. Sůndern wie vor
in der flůcht verharret. folget er ÿn aůch Inn der flůcht nach. So lanng
bis sich der tag zů der nacht neÿgeth.

Als nůn konig Wÿdekint mit sambt seÿnem Folck der
nachthalbenn nicht weÿter kůnt kůmmen. machtenn sie Fewrr
beschlossenn sich mit der wagenbůrck. vnnd gabenn sich zů der rwe.
redtten aůch miteinander von der vrsach der flůcht. Vnd wů von
sie wernn zů solcher flůcht gedrůngenn vnd bewegt wordenn.