Als der konig vonn Arelat solchs erfůr wart er hochlich dises herrenn zů=
kůnfft erfrawet. vnd lies ÿn bitenn. zů ÿm gein Valentz da er sein
hofflager die zeit hielt. Da er ÿm personlich vnter awgenn zcog. ÿn
gar freůntlich annam. vnd mit dem erobberten schlos Cůlliům. vnd
allen schlossern vnnd dorffern darzů gehorig gnediglich begabt. mit
angeheffterr zůsagůng ÿn aůch mit dem halbentail seines konigRaichs
zůůersehenn. so er beÿ ÿm bleiben wolt. Dann er het ain
ainigen Jherigen Sůn. die zeit beÿ seÿner schwester der konigÿnn vonn
Aragon in hispanien Aber herr Barolt wolt in kain weg bleiben.
Sůndern seinem gelůbd nach sein Walfart zů Sannt Jacoff verbringen.
Wiewol er dem benanten konig zůsagt. So ÿm Got wider zů Landt
hůlff ÿn zůersůchenn. Daraůff der konig ÿn gnediglich
mit grossenn gaben vnd ainem schonenn zewg abfertiget.