Zůstůndt da es tag was wordenn. fordert konig Wÿdekÿnt sein Folck
zůsammen. vnd trostet es. vnd hies es vberflůssig vnd vnnůtz sorg hin
legen. Wann sie hetten vnwissendt die hailige vnd geweÿhte stete an=
gegriffenn. Sie důrfftenn sich aůch in keÿn weg vor kůnfftigem vbell
besorgen. Sie hettenn sich nůn gnůgsam an den Franckenn gerochen. Sie
soltenn allein getrosten vnd frischenn gemuts sein. Vnd mit keckem gemůt
den feÿnden ÿr verlorn gůtter wider abgewÿnnen. Aůch Irer Gotterr
Iniůrien vnnd schmehůng rechenn. Welcherr kirchenn
die Francken vnd Frantzosen verstort hettenn. Sie soltenn an zweiůell
sein Ir Gotterr wůrddenn erliden behonůng an den Frantzosen rechenn.
vnd den Sachssenn glůck vnd haÿll zů sÿgen raichen. Vnd baldt
nach diser rede erhub sich konig Wÿdekint mitsambt seinem heer. Vnd
verhert mit dem schwert vnd fewr alle ding vnd gegent in hessen bis an
den Reÿn. Vnd betzwang die einwoner derselben gegent. von dem hailigen
Cristlichen glawbenn. widerůmb in den haÿdnischen vnglawben zůfallen.