Mit der zeit wart des Romischenn kaÿsers benante tochter disem
Fůrstenn So genaigt vnd gůnstig. Das sie ÿn vberredt ÿr das
eelich leben zúgeloben Weÿl sie aber merckt das solchs
seines geringenstants halbenn nicht mocht offentlich gescheen.
wůrden sie aÿnig solchs heimlich zůenden. Daraůff sie sich bede
in bose claider verclaidten. heimlich miteÿnander weg giengen.
Vnd an die gegent Im welschen gepirg Albigaůn genant kamen.
An welchem ort sie so lang verborgen beÿeinander warn bis sie
Dreÿ Sůn mitainander hettenn.