Jnsolchen hendeln hielts kaÿser karrll dafůr das konig Wÿdekint mit
solcher sorg můhe. vnnd forcht beladenn wer in Sachssen. das er keÿnen
weg vermocht seinen feÿnden widerstant zůertzaigenn. Vnd versah sich
gar nicht das der wůrd ÿm fůrnemen frembde gůter anzůtasten der die
seÿnen gedrůngen wůrd zůrettenn. vnd in fhar stůnd sein aigen Landt
vnd lewt zůůerliern. Aůch war kaÿser karll beraÿt an die gegent die
Fridstat heÿsset kůmmen. Vnd nachdem er sich nicht besorgtt vorr
konig Wydekint Oder andern feÿnden. hies er sein Folck sich zů feldt legen.
Aber indem erhůb sich konig Wydekint mit seinem gantzen vnd frischen heerr.
vnd fiell in kayser karls Wagenbůrg vnd heer eesich kaÿser karll recht
bewart. Darůmb erstach konig wÿdekint alle die Jhenigen die sich mit
ym zůslagen vnterstůnden. Vnd nachdem er der Franckenn vnd Frantzosen
vngestÿmmickait getempfft hett. trostet er die seÿnen. vnd lawtenn [lies: mit lautem]