Diser Marggraff hat ÿm eelich vertrawet Frawenn. Margareth. vonn
Sopheÿ geborn. hat aber kaÿn leiberben mit ÿr erlangt. Vnd ist
also gestorbenn. Nach Cristi gebůrt Tawsent Dreÿhůndert
vnnd Im Fůnfftenn Jhar. Vnd nachdem diser der letzt
Marggraff war gewest. aůs des Ersten Marggraůen Almars vonn
Montferrat geschlecht. Schicket kaÿser Andronick vonn
Constantinopell auff bit derselbenn Marck. herren Theodor
seiner Sůn ainen. Inn Jtalien bemelt verledigt Marck. als ÿm von
seiner Frawenn. nachdem sie vonn Montferrat gebornn was.
gehorent. einzůnemen. Wie benanter Theodor aůch
thet. vnnd Sůn erlangt die nach ÿm bemelte Marck aůch regirten.
vnnd Marggraůen zů Montferrat warnn.