solt sein Vetter bringenn. Aber es geschah alles zů aÿnem scheÿnn.
vnnd allein Grÿseldt hertz bas zuúersůchenn. Dann die
JůnckFraw was sein tochter. vnd den er sein Vettern hies was sein
Sůn. Derhalbenn der Marggraff ein tag zůůor ee die New brawt solt
einkúmmen. vnd alle sachen gleich als zů ainem eelichenn beÿlager
berait warn. schicket Marggraff Walter nach der Grÿseldt. Die also In
ainem bosen zůrissenn peltz kam. vnd als des Marggraůen Sůn vnnd
tochter miteÿnander kamen. vnd die Grÿseldt nicht anders wůst. Dann ÿr herr
wolt ain ander Frawen nemen. vnd ÿr tochter wer die recht brawt. gieng
ÿr Grÿseldt entgegenn. vnd entpfieng sie als ir Frawen. vnd
die Jhenige die sie dahin gebracht hett mit aller demůt vnnd ere.
Vnd nachdem nůn Grÿseldt sah das die Iůnckfraw ser schon
was. Sagt sie zů ÿrem herren. dem Marggraůenn Walter also. Mein herr ich
bit dich aůffs vleissigst dů wellest dise zcarte Jůnge brawt ÿe nicht mit
der widerwertickait betrůbenn. damit dů mich betrůbt hast. Vnnd weil sie
solchs trostlich zů ÿm redt. kůnt der Marggraff ÿr grosse gedůlt vnd
demůt nicht lenger verdůlden. Vnnd Saget. Meÿn liebe Grÿseldt dein
glawb vnd trew ist mir gnůgsam bekant. Jch halt es aůch dafůr.
das der vnnter dem hÿmmell nicht seÿ. der grosser lieb vnnd trew von
seiner eelichenn gemahell efarn [lies: erfarn] hab. Dann ich vonn dir. Vnd
mit solchen worten nam er sie Inn gegenwertickait. des gantzen
Folcks aůffs aller Freůntlichst in sein arm. vnnd Sprach dů bist
mein aÿnig ee Fraw. Ich hab aůch keÿn andere nÿe gehabt. Wil aůch
kaÿn ander haben. Aber die Jůnckfraw die dů fůr mein brawt
heltest ist dein tochter. Vnnd den ich meÿn vettern nenn ist dein
Sůn. Vnd die dů vor verlorn hast gehaltenn. sein wider fůnden wordenn.
Da das die Frům Fůrstÿnn hort. fiell sie Irn kindern mit grossem
weÿnenden aůs sůnderlicher fraid vmb ÿr hels. Vnnd die
Edelnn Frawen zcogen der Fůrstÿn ÿre geringe claÿder aůs. vnd
Fůrstliche claider wider an. Vnnd derselb tag wart darnach in vil
grosser frolickait dann der hochzeit tag zůgebracht. Aůch lebtenn
sie darnach vil Jar In grosser loblichen eÿntracht vnd lieb. Vnd hettenn
vil kÿnnder miteÿnander bis Inn vil geschlecht
reichendt. Wie Franciscůs Petracha. Vnnd Jacobůs vonn Bergem schreibenn.