Walprechts zů Sachssenn. Oder als etlich habenn zů Engern Virder Sůn
wirt aůch in etlichenn Cronicken genant Ditterich Wÿdekint. Darůmb das
er aůs des Grossen Wÿdekints geschlecht ist gewest. Er
wirt aůch in etlichen Cronicken genent ain Graff zů Ringelhaÿm Jtem
Bůrggraff zů Zcorbick. herr zů Bůdzes. Vnnd Graff zů Wittÿn
Aúch nennen die Cronick aůff dem Lawternberg. vnnd zů Mersbůrg
vnnd die aůszcůge aůs denselben Cronicken gemacht disenn herrn
nicht hertzogen Sůndern schlechts ein Graůen zů Wÿttin vnd
ein man besůnderer freihait. Vnd soůil aůs den bemelten aůszůgen
ist zůmerckenn Darůmb das kaÿser karll nach bekerůng derr
Sachssen alle Fůrstenthůmb in Sachssen hab abgethan. vnd alle
herschafft derselben Lanndt den Bischoůen vnnterthenig gemacht.
aůff das die Lanndt dester bas mochten beÿ dem hailigen Cristlichen
glaůben behaltenn werden. Ist aber zůbesorgenn
das dieselb maÿnůng nicht fast bestendig vnnd gegrůndt sey.
Angesehenn das kaÿser karrll konig Wÿdekint zů ainem Grossen
hertzogenn gemacht hat. vnnd das er sein Sůn Wÿprecht sein
brůder Braůn. vnnd andere vil sein nachkůmmen vnnd freůndt sein
gewesen. vnd genant worden Hertzoge. vnd zům tail Gross
hertzoge zů Sachssenn.

Vnnd nach antzaigůng etlicher Cronickenn so seint aůs dises herren
geschlecht die hertzogen in Obernn Westphaln vnnd die Graůen
zů Ringelhaÿm kůmmenn.