seines Folcks auff die hohe des nechstenn Bergs. vnd reckt aůff das Panerr
mit dem hailigenn Creůtz. vnnd vil hochwirdigs hailthůmbs. Fiel aůff sein
knÿe vnd bat den Almechtigen vmb sein gotliche gnad vnnd hilff mit disen
worten. O Got mein herr vnnd schepfferr hÿmmels vnd der erden. dise
gegent warlich ein stat nicht des frids. důrch vnser mÿsvbůng vnd sůnde ist
gewest ein grosser schade vnd nachtaill deinem Folck. Aber lieber herr ker
dich wider zů vns vnd erlos dein diener aůs den hendenn Irer feÿndt. Vnd
begib nicht die sel deiner diner vnd lobsager den bestien. Sůndern sich an
mein demůt. můhe. arbeit. vnd anligen. Vnd vergib vns alle vnser sůndt
Sÿh an das vnser feÿndt gemanchfeltigt seindt. Vnd vns nicht mit vnbil=
lichen hass vnd widerwillen verfolgen. von deÿnet wegen. Wann sie dich
vnd alle deine getrawen vnd glawbige hassen Darůmb Almechtiger
Herr erheb dich in deinem zcorn. vnd las vnser feÿndt flůchtig vnd abwendig
werdenn. Schlag sie mit solcher blintheit das sie aůffhornn vns zůůerfolgenn.
vnd dů mein got vnnd herr hab in achtůng mir zuhelffen. O meÿn be=
schůtzer las dir gefellig sein mich zúerlosen. So wil ich dir zů eren disen berg
in ewickait wirdigen. Vnd zů ewigem lob vnnd gedechtnůs deines gotlichen
Wůnderzaichens den hůlffberg nennenn.

Jnn dem wart es nacht vnnd konig Wÿdekint kam von der Sÿghafftigen slacht.