Grossenn vater nam. die aůch desselbigenn kaysers Otto des Grossen
můtter ist gewest. Welche aůch nach antzaigůng etlicher Cronicken ein
Closter zů Ringelhaÿm gestifft hat.

Vnd nach disem herren findt man keÿnen mer aůs des Grossen Wÿdekints
geschlecht hertzogenn genant. Vnd ist soůil man kan aůs mancherleÿ
Cronicken mercken. důrch dise vrsach gescheen. Nachdem kaÿser. Otto.
der Gros das hertzogthůmb zů Sachssen vnd zů Lůnenbůrg verlÿh. einem
Erbarn frůmmen Edelman genant Herman vonn Stůppeshornn
hat er villeicht den andern hertzogen zů Westphaln Oder Engern den
titel des hertzogthůmbs genůmmen. Damit der titel solt hinfůr beÿ
den herren bleÿben die hertzogenn in Sachssenn werenn.

Das aůch diser Fůrst wirt in etlichen Cronicken genant herr Dittrich von
Bůdzes. das kůmbt nicht aůs der gebůrt. dann er ist keÿn gebornnerr
Bůdzetzer gewest. Sůndern ist kůmmen von der Cristlichen Frawenn Geua
konig Wÿdekints. Aber die Bůdzezer. oder das geschlecht der
vonn Bůdzetz ist kůmmen von der haidnischen Frawen konig Wÿdekints
Swatana von Behem etc. geborn die Im vnglawben gestorben ist. Das
aber diser Fůrst wirt der Bůdzetzer genant. kůmpt villeicht daher. das
die rechten Bůdzetzer alle abgestorben sein. vnd das die andern nachkůmmen
konig Wÿdekints als die nechste freůndt haben Bůdzes vnd die andern verledigt
herrschafft geerbt.

Weÿl nůn der Romisch kaÿser. Otto. der Gros das hertzogthůmb zů Sachssen
wie obenn gedacht ist. verlÿhen hat. vnd den titel des hertzogthůmbs zů
Sachssenn wiewol ein rechter vnnd geborner zů Sachssen selbst nicht
behalten hat. Ist es nicht seltzam das die der selbig titell allein
beÿ den blÿben ist der vorfordern kaÿser Otto der Gros das hertzogthůmb
zů Sachssen gelihen hat. Daůon ist kůmmen das dieser
hertzogenn zů Sachssenn. Landtgraůen in důringen. vnd Marggraůen zů
Meyssen vorfordern in vorzeiten hertzogen zů Sachssen. darnach konige
zů Sachssen. darnach grosse hertzogen zů Sachssen. Darnach weil kaÿser
Otto das hertzogthůmb zů Sachssen an frembde hende gebracht hett.
sein gewesen. Graůen zu Brene. vnnd zů Wÿttin. Darnach
Marggraůen zů Meÿssenn. mit der zeit aůch Lantgraff zů Důringen
wordenn. Vnnd entlich wider zů ÿrer erstenn vnndrechten herschafft dem
Hertzogthůmb zů Sachssen kůmmen sein. Wie dann alles ein
ÿtlichs in seÿner Ordnůng folgen. vnnd angetzaigt wirt.