wider. vnnd gebot die Vbrige Francken vnnd Frantzosen in den holtzernn
vnnd gebÿrgenn zůsůchen Vnnd nach ÿn zůtrachtenn. Aber kayser karll
zcog die ganntze nacht vnd entgieng also konig Wÿdekints handen. Vnd da
kaÿser karrll an den berg kůmmen was. der die hessen vnd wedrawer schaÿdt.
nehet es sich gegen dem tag. Als nůn konig Wÿdekint erfůr das ÿm kaÿserr
karll entgangen was. wart er mit grossem zcorn bewegt. vnd folgt kaÿser
karrl zústůndt starck nach. Da aber kaÿser karll an ain holtzichen
berg kůmmen was. erfůr er das seins heers ein taÿl aůff dem ebenfeldt vmb=
zcoge. vnd nachdem sie in besorgůng warnn. sie mochten daselbst vonn den
feÿnden vberfallen werden. Weÿssaget er den seÿnen das derselbig Bergk wer
ein berg des frÿds vnd nicht ein berg des kriegs oder streits. Vnd zcog also mit
den seinen bis an den Meÿn. Daselbst erfandt den andern tail seines heers.
mit grosser forcht vnnd schambeladenn. Derhalben er sie gar gnediglich
vnd freůntlich anredt. vnd hies sie můtig vnnd getrost sein. Daraůff
kaÿser karls Folck. sich zů der rwe gab. vnd entpfangen wůnden haÿlet.

Weil sich die Frantzosen vnnd andere kaÿser karls lewt. haÿltenn vnnd
erqwicktenn kamen ÿr nachtreber vnd verkůndten ÿn wie das konig