Als nůn diser Graff benants Marggraůen von Brandenbůrg
tochter genůmmen hett. vnd mercklich an Raichthůmb aůch zůgenůmmenn
hett. erhůb er sich seines glůcks. vnnd wart stoltzer. dann er vormals
gewest war. Vnd nachdem gedachter Marggraff Dittrich
vonn Brandenbůrg entsetzt was. vnd Graff Lothar vonn Walbeck.
dieselb Marck erlangt hett. erwůchs ain schwer vnaÿnickait zwischen
Irn beden sůnen. Bernhart vnnd Wernherr. Welche zwÿtracht
erstlich nach ÿrer eldern abgang. recht aůsbrach. Vnd
diser Graff Dedo hielts mit Marggraff Bernhart von Brandenbůrg
seyner schwester [lies: Frau] brůder. Vnnd thet Graff Wernher von Walbeck
vil leidts. vnnd schaffet neben anderer vnfreůntschafft soůil das
desselben Stat Wolmerstet verhert vnnd aůsgebrant wart. Aúch
gab er ÿn bey der Romischenn kaÿserlichenn Maiestat so schwerlich an
das er ÿn gar schier vmb all sein gůter gebracht hett.