Darnach zcog kaÿserr karll an die Wÿserr verhoffendt aůch in Ostualn
zufallenn. Ann dem selben ort hett hertzog Braůn konig Wÿdekints brůder (.
wie zům taÿl aůch oben in benants hertzogen Braůns leben erzelt ist .)
den fůrt verlegt. Aůch hettenn die Ostůaln das tal da důrch Kaÿserr
karrll zciehen solt. Wiewol nicht nach dem besten besetzt. Nichts desterr=
weniger kam kaÿser Karrll mit gewalt vberr. vnd legt sich fůr derr
Sachssenn Slosser aÿns. Darůmb kůnten die Ostůalnn
solche gewalt nicht erleÿdenn. vnd flogen. Also behielt kaÿserr karrll
bede gestat. Zeprach die besetzůng. taÿlt sein heer in hawffen. Vnnd
lies ain taÿl an benantem wasserr zů der hinderhůt. Aber er zcog
mit den andern bis an das wasserr die Encker genant. Da
kam zú ym der Eldistenn Sechsischenn hertzogen ainer Edilů°ack
gnant. vnnd gab sich kaÿser karrll in gnad. mit verpfendůng
seÿnes adels vnnd verwilligůng das tribůt zůraichenn.