Angetzaigterr schlachthalben machet konig Wydekint eÿn Folck aůs
vil Lannden. vnnd fordert die Fůrstenn. herren. vnd den Adell Im Lanndt
zů Sachssen fůr ÿn. vnd zcaiget ÿn an. das die Frantzosen nach erlangtem
Sÿg in kaÿn weg rwen wůrdenn. Sůndern sich vonn tag zů tag mer
vnnd mer bevleissen aůs den erobberten schlossern aůch vmbligende Landt
vnd Lewth an sich zůbringen. vnd ÿn gehorsam zůmachen. Darůmb
wer die zeit kůmmen. daran die Sachssenn můsten ir verborgenn
streitbarkeit vnnd redlickait an das licht gebenn. Vnnd nicht lengerr
verbergenn. Es werenn aůch bisherr der Sachssenn gemůt
vnvberwintlich blÿbenn. Vnd hettenn alleweg aůs angebornnerr
tůgent lieber wollen sterben. dann vberwůnden werden. Vnd
wiewol sie in etlich grosse not kůmmenn. doch weren sie Irerr
vorigen vnnd alden tůgent vnůorgessenn vnnd vnentwertt.