Vonn diser Frawenn gebar er kaÿnn sůn vnnd ain tochter. Bertrada.
eÿn Greůÿn von Duringenn Welche darnach verhaÿrat wart
dem Ersten Graůen Beringer von honsteÿn Graůen Lůdwigs
von Duringen des bertichten Sůn. Daůon alle Graůen von honsteÿn
kůmmen seÿn.

Vonn den zweÿen mittell sůn offgedachts Marggraůen Dittrichs
Dedo vnnd Thÿmo. werdenn mitsambt der vormeldůng ÿrerr
kinder nachkůmmen. vnd geschicht indas nachfolgendt Bůch kůmmen
DarInne alle die Marggraůen von Meÿssen vnd Lawsatz
begriffenn werdenn. die in der itzigenn Hertzogenn zů Sachssen
Lanntgraůen in Důringen vnd Marggraůenn zů Meÿssenn.
geschlecht vnd stammen gehorn. Alle von dem grossen Wÿdekint
vnd seinenn vorfordern den Alten konigenn von Sachssen entsprossen.
Derhalben aůch die benante zwen herren Dedo vnnd Thÿmo bis hieher
verzcogenn vnd obenn vbergangen sein.

Weÿl aber Graff Dedo vonn Wÿttin allein die Marck Inn der
Lawsatz vberkůmmen hat. wirt villeicht das best sein. das er
werde aůch in disem Bůch begriffenn. Damit die Marggraůenn
Vonn Meÿssenn allein můgen vnnd derhalben dester ordenlicher
angetzaigt werdenn.