Adelhait. wart ein Marggreůÿn zů Osterraich. Vnd
wart verhaÿrat Marggraff Ernst vonn Baÿrn Oder als
etliche habenn Marggraff vonn Osterraich von welchem sie
gebar Marggraůenn Lewpolt.

Agnes. wart gegebenn Pfaltzgraůen Fridrich vonn Sachssenn.
Mit welchem sie het Dreÿ Sůn. Adalbertům. den
ErtzBischoůen zů Bremen. Fridrich. Vnd Dedonem baÿde Pfaltzgraůenn zů
Sachssen. Welche stiffter sein gewesen
des Closters Gosÿck. Das ist gebawet wordenn. Nach Cristi
gebůrt Tawsent ainvnndvierzick. in dem kaÿserthůmb des dritten
Kaÿser hainrichs Viertenn Ihar.

Sie hett aůch ain tochter. Odam. Welche verhaÿrat wart. Fridrich
dem Edeln schencken vonn Sommersbůrg. Mit dem sie
hett ain Sůn Fridrich. PfaltzGrafff zů Sachssenn.

Als dem aldenn Marggraůen. Dedo sein erste Fraw gestorben was.
Desgleichenn aůch ÿr Sůn Marggraff. Otto. Nam er zů seiner
andern frawen desselbenn Marggraůenn Otto nachgelassene witwe
Frawen. Adelhaiden. des hertzogenn zů Brabant tochterr.
Also nam er dess witwe zů weÿb. des muter er vor aůch zů seinem eelichen
gemahell gehabt hett.

Von dieser andern frawen gebar er Dreÿ Sůn.

Graůen Dedo. den Jůngernn. der Iůng gestorbenn ist.

Graůen Cůnradt. vnd Graůen. hainrich. sein erbenn.