Derhalbenn wer itzt nit vonn noten das gifft newlich in Westůaln
erwachssen zůvnnterdrůcken ee es aůch in Ostůaln schlich vnnd
einbrech. Welchs leichtlich weil es new werr. aber schwerlich so es
veralt. vertilget werdenn. Derhalben hett er aůch eÿn Folck
aůs Frieslanndt zů wegen gebracht. den hawffen des erslagenn Folcks
widerrzúerfůllen. Er wolt aůch dÿweil er lebt der Sachssenn recht
vnd alther kůmmen lassen vergeen. Darúmb wolt er aůch der
Sechsischenn Gotter Iniůrien vnd schmeůng rechenn. Demnach
weren sie menner vnd hetten mennliche hertzen so soltenn sie ÿm
wider die Frantzosen folgen. Dann es wer loblich vonn dess
vaterlands wegenn zůsterbenn. Důrch diese rede bewegt Konigk
Wÿdekint der Sachssen gemůt. so hoch das sie alle ÿm zůfieln. vnnd
ainmůtiglich schrÿen er hett wol vnnd recht geredt. Wann das
gemeÿn hail stůndt in bewapenter handt. damit mann můst die
Freihait vnd alles wolgeen der Lanndt erhalten. Aůch sagtenn
die Sachssen es wer von notenn vor allen sachenn vnnd Erstlich
Irn got Mars widerzúůersůnen. dann nicht ee hettenn sie sůst
glúck vnnd Sÿg zůůerhoffenn. Darůmb bracht konig
Wÿdekint damit ain gros Folck zůsammen. vnd machet ganntz
Sachssen dem hailigen cristlichen glawben. vnd kaÿser karrll wider
vngehorsam vnd abfellig.

Konig Wÿdekint lies sich aůch an vorbemelter vnaÿnung nicht