Darnach als benanter Marggraff Odo vonn Lawsatz an leibserben
gestorbenn was. leÿh der Romisch kaÿser hainrich des namen der
Dritt Graůen dedo vonn Wÿttin Graůen Dittrichs vonn Wÿttin Sůn
die verledigte Marck zů Lawsatz. Also kam sie zům
Ersten an der hertzogen zů Sachssen Lantgraůen in Důringen vnnd
Marggraůen zů Meÿssenn vorfordernn.

Darnach was sein Sůn Marggraff. hainrich. aůch Marggraf zů Lawsatz.

Folgent aůch Marggraf. hainrich. der Junger. Vnd nachdem er an
leibserbenn starb.

Marggraff. Cůnradt. von Meÿssen. vnd Graff zů Wÿttin.

Darnach Ditterich. Marggraůen Cůnradts sůn důrch das testament
seines Vaterr.

Folgent Marggraff. Cůnradt. von Lawsatz der Im tůrneÿ ist vmbkůmmen.

Darnach Graff. Dedo. vonn Rochlitz Marggraůen Dittrichs
Vonn Lawsatz brůder der die Marck zů lawsatz vom Romischen
kaÿser Friderich vmb Viertawsent marck můst losenn.

Cůnradt. Marggraff zů Lawsatz Graůen Dedo von Rochlitz Sůn.

Darnach Graff. Dittrich. zů Weÿssennfels ein vater des ersten
Lanntgraůen Hainrichs in Důringen aůs dem haws zů Meÿssen.