Das Lanndt zů Meÿssenn ist in vorzeiten der Sorben vnd Wendenn
wonůng gewest. vnd hat nach Teůtzscher Sprach Lommitsch. Aber Sorbisch
vnd Wendisch Glomaci. von ainem brůnnen als Tethmarùs schreibt
geheissenn. Wann Glomaci ist eÿn Brůnne zwů meÿl von der Elb
gelegen. von dem etwan die eÿnwonende heÿden vil wůnders gesagt haben.
Dann aůs denselbigen brůnnen floss ain teich. Vnd wenn ein gůter
frid. vnnd gnůgsame frůchte solten Im Lanndt zů Meÿssen werdenn. So
fandt man disen teich vol getreids. Weÿss. habern vnnd eÿchelnn.
Derhalbenn die vmbligende nacion vnd haiden grosser antzall dahin
lieffenn. als wir Cristenn zů den hailigenn wallen Aber wenn die
Meÿsner ein krieg oder annder vnglůck vbergehenn solt. fůnt mann disen
teich blůtfarb vnnd foller aschenn. Vonn disem
Brůn. wart das Lanndt zů Meÿssenn von der Elb bis an das wasserr
kempnitz Glomaci geheissenn. vnd hett dise Stet Glomaci. Strela.
Belgern. Jana. Rochelentz. vnnd Cůttitz

Aůch hat das Lanndt zů Meÿssenn etwan ain eÿgen herren gehabt.
Es ist aůch etwan der Wenden vnnd Behemen Fùrsten, Aůch ein zeit
den konigen vonn Franckraich vnterthenig vnd zcinsbar gewest.
Man findt aůch in etlichenn Cronicken das das Lanndt zů Meÿssenn. in
vorzeitenn hat Delmancia geheÿssenn Aber beÿ vnsern
zeitenn heisset es Meÿssenn. genant vonn ainem cleÿnenn flies der
beÿ Meÿssenn gegenn mitternacht flewst. Wendisch genant Misni.