Da hertzog Boleslaw von Poln Marggraůen Eckharts tot erfarn hett, hůb
er sich in das Lanndt zů Meÿssenn. Nam ain Lawsatz die Stat
Bawdessenn. vnd alles das Gero genset der Elb besas. zcog er aůch vber
die Elb. stůrmt Strel. vnnd machet die bůrger zů Meÿssenn mit gaben
zů vorretern. Dann ains tags da die maist Ritterschafft aůff der
fůttrůng was. schicktenn sie nach Graf Gůntzelin. der heÿmlich
zů der pforten gegen dem aůfgang da die Wenden wonten eingelassen
wart. Also verlieffenn sie das Schlos. vnd fordertenn Marggraf
herman aůs. Entlich wart den aůff dem Schloss ein gleÿdt
gegebenn an schadenn wegzůzciehenn. Also wart hertzog Boleslaw
von poln eingelassenn Der aůch das ganntz Landt bis an die Elsterr
mit seÿnen lewtenn besetzt.