Weÿl nůn Gůntzelin Marggraůenn Herman alles vermůgens
Verfolgt. Strel vnnd Rochlitz verbrent. ertzeigt ÿm widerůmb Marggraff
Herman allen verdrÿs. Vnnd nachdem er wůst das er sůnderlich lieb
zů der Stat vnnd dem Schloss Camborg hett. zcog er darfůr. vnnd als er es
gewůnnen vnd den Rawb seiner Ritterschafft gegebenn hett. zcůndts an.
vnd verherts in grůndt. Vnd nachdem Graff Gůntzelin
aůff kaiserlich beůelh wart gefangenn. kam Marggraff herman.
wider zů seinem veterlichenn erb. Vnnd starb Entlich an
leibserbenn. Vnnd wart zů Meÿssenn begrabenn.