Als ditz kaÿser karll Jnnen wart schicket er den Cristen aůff ir bit wider
konig wÿdekint. ein gros Folck. mit sambt dreÿen Graůen. Adelgis.
Gilo vnd Warandt. die Cristenn Im hailigen glawben zůerhaltenn
vnd wider die haÿdenn zúretten. Vnd wiewol die Frantzosen ser
starck kamen. doch lies konig Wydekint von seinem fůrnemen nicht
ab. vermeÿnet das ÿm nÿmants gleichmes vnd starck genůg wer.
mit ÿm zůstreiten. Aůsgenůmmen kaÿserr karrll. Als nůn die
schlacht angieng strÿten die Frantzosische Graůen aůs ver=
trawen Inn ÿrer menig vnůorsichtiglichen mit konig Wÿdekint.