Als nůn konig Wÿdekint sah das kaÿser karrl ain so grosse anzal der
Sachssenn hett so grÿmmiglichen richten lassenn. vnd des grossen verdrÿs
trůg. gedacht er sein letzte crefft zů ůersůchen. fieng ein hertz. vnnd bracht
aůs allenn wendischen Landenn lewt zů sich. Vnnd zcog mit seÿnem
vettern hertzog Albio vnd ainem grossen heer aůs Zcorbick in Ostůaln
vnd fordert vor sich alle die Jhenen der Sůn. brůder. Vettern oder freůndt
kaÿser karl kůrtz daůor hett lassen enthawpten. Vnd redt dise maÿ=
nůng mit ÿn. Ir habt alle gůt wissen das ir mich vorlangst habt
zů ewrm konig wider die Francken vnnd Frantzosenn erwelt. bisherr
mit glúck. dieweil vnnd so lang die alte vnnd genÿtte Rewter vnnd
andere gúte vnnd geschickte krÿeger gelebt habenn. Aber ich schem mich
nůn ewer itzig vnsÿnnickait zůmelden vnd zůentdecken. Darůmb das
ir gar nichts nach ewrn streÿtbarn redlichen eldern vnd vorfordern geraten seÿt.