mit den nachbarn vmb den flůr rÿt. Vnnd als er von den Jůngenn
gesellen pferd ainem důrch schnelhait vberwůnden. wart. er an ein
backenn geslagen. Das verdros ÿn fast ser. vnd beclagt sich
diser schmehůng gegen seÿner můtter mit weÿnenden awgen. Daraůff
ÿn sein můter trostet. Vnd Saget. Meÿn lieber Sůn seÿ vnbekůmmert.
Vnd hab ain gůtenn můth. Wil got So wil ich dir aůff das nechstkůnfftig
Jar ein besser vnnd schneller pferd schaffenn. Da dů deinem widertail
magst vergeldůng thůn.

Als nůn das Jar vergangenn war. nam Graff Thÿmo eÿn ser schnelllaůffent
wolgeschickt pferd Vnd als er dem Jhenigen vorkam
der ÿn Im vorigenn Jhar an backenn geschlagenn hett. vergas er
derselbenn verletzůng nit. Vnd gab ÿm aůch ein solchen backen schlag
das er zů der erdenn fiell sein hals brach. vnnd zůstůndt starb.