Derhalbenn er sie aůch ein meÿl vonn ÿm weÿst. vnnd verwarff
bissolang er důrch vermanůng des ErtzBischoffs von Magdebůrg
vnd andererr Bischoffenn sie wider zů sich nam.

Darnach aus sůnderlicher andacht vnnd vmb der lieb Gotes willenn
nam diser Graff an sich das Creůtz. vnd zcog mitsambt vil
andern Cristlichen Fůrsten in das hailig Landt, dasselb helffen
wider den vnglawbigen abzůgewÿnnen. Vnd befalh seinem Brůder
Marggraff Cůnradt das angefangen Closter aůff Sannt Petersberg
zůůerbringen vnnd aůffzůbawenn.