aůch kaůfft vonn ÿrem aigen geldt vil gůter vnnd gab dieselbenn dem Closter zů
Lawternberg. Aůs welchen nemlich Achtzehenn hůfen Landts warn Im dorff hÿtzkindorff. Dreÿzehenn hůfen zů Saltzmůnde Sechs hůfenn In Vdenhaÿm. vnd Funff hůfenn Růsedalh.

Vnnd hett mit ÿr Sechs Sůn.

Hainrich. Otto. Ditterich. Dedo. Hainrich. vnd Fridrich.

Hett aůch Sechs tochter mit ÿr

Bertam. Odam. Agnetem. Gertrůdem. Odelam vnd Sophiam.

hainrich sein Erster Sůn starb ein kÿndt.

Otto der annder Sůn wart Marggraff zů Meÿssenn.

Dittrich wart Marggraff in der Laůsatz.

Dedo wart Graff zů Rochlitz.

Hainrich der annder war ein Graff zů Wittÿn.

Vnnd Fridrich. war ein Graff zů Brene.

Die Erste tochter zwů Bertha. vnnd Oda. wůrden Eptissÿnn.
zů Gerbstet.

Agnes. wart Eptissÿn zů Qůidlingbůrg.

Gerdtrůd nam den Pfaltzgraůenn am Reÿn. vnnd da derselb an
erbenn gestorben war. bawet sie ein Jůnckfraw Closter zů Bamberg.
in der ere des hailigenn merterers Sant Theodor. Vnd gab sich dareÿn
vnd beschlos ÿr lebenn In grosser andacht.

Odela. ader aber als etliche habenn Adela. nam den konig Sweno.
von Denemarck. welcher darnach von den Denen erschlagen wart.
Darnach nam sie Marggraff Albrecht von Brandenbůrg den Jůngern
Marggraůenn Cůnradts Sůn.

Sophia. die Sechst tochter nam Graff. Gebharten von Baÿrn
des Romischenn kaÿsers Lothar Sůnn.