vonn Groÿsck zu wider vnnd missgůnst dem Hertzog Lůder.
oder lothar vonn Sachssenn. Begerendt denselben hertzogen von Sachssen
důrch gedachtenn Marggraůen zůdemůtigen Derhalben
benanter hertzog vonn Sachssenn mitsambt andernn Fůrsten vonn
Sachssenn sich in krieg gab wider ÿr missgůnner. Vnd Graůen
Cůnradt vonn Wÿttin vil gedachtenn Thÿmo Sůn. mit gewalt in
die Marck zů Meÿssenn fůrt vnd einsetzt. Darzů aůch entlich
die einwoner nit vnwillig nach vngenaigt warn. Als nůn hertzog
Lůder wider vmbzcog gab er disem Marggraůenn Cůnradt zů
Eÿlenbůrg die Ostermarck. důrch abgang des Marggraůen hainrichs
von Eÿlenbůrg ledig gestorbenn Welche ÿm aůch důrch
erbpflicht gebůrt. Derhalbenn aůch aůff gebot des Romischen
kaÿsers hertzog Wladisla von Behem vnd sein Brůder Otto.
ein gros heer vonn Behemen vnd Merern zůsammen bracht. vnd in
die Marck zů Meÿssenn an ainem ordt zcog. Vnd legt sich zůfeldt
nit fernn von der Stat Meÿssenn. An ainem andern
ordt zcogenn Marggraff wÿgbrecht. Vnd der ErtzBischoff zů Meÿntz
aůch mit eÿnem heer in das Lanndt, vnnd legtenn sich an die Milda.
Aber hertzog Lůder vonn Sachssenn legt sich zwischen dieselbenn
zweÿ Heer damit sie nit mochtenn zůsammen růcken. In mitler
zeit fieln des Hertzogen freůndt dem Marggraůen Wÿgprecht. in
sein Lanndt vnd verherten dasselb gantz Derhalben
Marggraff Wÿgbrecht zůrůck zcog seinen armen lewthen. in
ÿrn noten beÿstandt zůertzaigen. Da das der hertzog von Behem
merckt. wolt er aůch nit lenger bleÿbenn. Vnd brach aůff. wiewol nit
an schadenn seÿnes Folcks. Als nůn der hertzog
widervmb zcog legt er sich fůr Libz fieng des phlegers von Meÿssen
Sůn. vnd zcog mit sÿghafftigem heer frolichenn wider heÿm.