Nachdem nůn konig Wÿdekint ÿm fůrgenůmmen hett all seÿnn
vermůgenn an kaÿser karrl zůůersůchenn damit er mocht bey seÿner
freiheÿt bleÿben. geschah baider saÿtenn von den Sachssen vnd den Frantzo=
senn ein ser harter streÿt. Aber entlich wart Konig
Wÿdekints heer in zweÿ tail gedrent. vnd in die flůcht getriben. Derhalben
aůch konig Wÿdekint mit aÿnem tail seines heers in die Stat hasel=
můnd flog. Der annder tail genos der nacht. vnnd kam darůon ee der
nachfolgendt tag anbrach. Also lies kaÿser karll den streÿt endenn.
Vnd gebot den seÿnen sich in rw zůgebenn. In maÿnůng sich des nechst=
folgenden tags wider mit den feÿnden zůschlahenn.