Jn dem nechstfolgenden Jar darnach setzt der Romisch kaÿser Lothar ein
Reichstag gein Meintz an. da aůch ein trefflich antzal der Fůrsten vnnd
herren des hailigen Romischen Raichs erscheÿn. Vnter welchen herren
aůch Marggraf hainrich aůs Lawsatz. Marggraůen Wÿgbrechts
Sůn war. Vnd als er sein leben zů Meintz beschlossen hett. an verlassung
etlicher leibserben. fiel die Marck an den Romischenn kaÿser. In
dem kam Marggraff Cunradt von Meÿssen wider aůs dem hailigenn
Landt. vnd wart mit der Marck zů Lawsatz. vnd mit der Grafschafft
Groÿtzn. vnd allen andern gůtern des verstorben Marggraůen hainrich
von dem Romischen kaÿser gnediglich belehent. Also vberkam dieser
Marggraf vber grosse raichtůmb gůter. macht. vnd Ere. Vnd Nemlich
alle die Lant vnd gegent von dem Wasser Růswin bis in Důringen. Aůch
die Grafschafft Wittÿn. Brene. Eÿlenbůrg Groÿsck. Lisnick vnnd
Rochlitz. Vnd wie der almechtig Got disen Fůrsten het mit raichtůmb vnd
gewalt begnadet. also hat er ÿn mit vil kindern vnd erben seliglich vnnd
mildiglich begabet. Wann ÿm bescheret got wie oben angetzaigt ist sechs Sůn vnd sechs tochter