Beÿ disenn zeiten erwegt sich abermals das Cristlich Folck in
Teutzschen Landen. in das hailig Landt. wider die vnglaůbigen.
darzů in Germanien dise nachgeschriben Fůrsten fůrnemliche
anheber vnd anreger warn. ErtzBischoff Fridrich vonn Meÿntz. vnd
Sant Bernhart der hailig Apt zu Clarevall. Es warn aůch in
derselbigen heerfart. dise Fůrsten ErtzBischoff Wigman zů Magdebůrg vnd
ErtzBischoff Diethmar von Bremen. Bischoff Růdolff von halberstat
Bischof Werner von Můnster. Bischoff Reinhart von Mersbůrg
Bischoff Wicker vonn Brandenbůrg. Bischoff Anshelm von
haůelberg. Bischoff Werner von Verd. Vnnd Bischoff hainrich
aůs Merern. Aůch der Abt Wÿbolt vonn Corbeÿ. hertzog
Hainrich von Sachssen. vnnd diser Marggraf Cůnradt vonn
Meÿssen vnd Lawsatz In demselben heer warn. aůch Marggraff
Albrecht vonn Brandenbůrg. Fridrich von Sůmmerschenbůrg.