Also brachtenn der Marggraff vnnd Graff Hoÿer die tot Marggrefÿn
beÿ der nacht aůff Sant Petersberg daselbst sie aůch aůff dem
nechstfolgenden tag gar erlichen begraben wart. An welchem
tag aůch der Marggraff ÿrer selen zů haÿl achtzehen hůfen Landts
zůstifftůng dreÿer altarr gab.

Nach Cristi gebůrt Tausent hůndert vnd darnach Im Fůnfftzigsten Jar
Da Marggraff Cůnradt sah. das die Aptey Nÿmick von seinen eltern
gestifft von wenickait wegen der zins. vnd des vnfrůchtigen ertrichs.
nit kůnt die wehr vnd kaÿn bestandt haben. bracht er zůwegen beÿ dem
Babst Eůgeniůs das dasselb closter dem stifft aůf Sant Petersberg eingeleibt wardt.