zůůersehen. beschlos er sich in dasselb Closter zůgeben.
Derhalbenn er den ErtzBischoff Wÿgman von Magdebůrg seiner Swester Sůn.
Mechtilden. vnd Marggraff Albrecht vonn Brandenbůrg seinen aÿdam
mitsambt seinen Sůnen. Aůch vil andern gaistlichen vnd weltlichen
leůthen. Rittern Edeln vnd andern vor sich aůff Sant Petersberg fordert
In ÿrer gegenwart sein fůrnemen zůůerbringen. Weÿl er aber in
besorgůng was sein Sůn mochten nach seinem tot zwÿtrechtig werden.
vber yrem Fůrstenthůmb tailt er dasselb beÿ seinem leben. Nemlich also.
das sein Elster Sůn Otto solt die Marck zů Meyssen haben.
Ditterich die Marck in Lawsatz. Dedo die Grafschafft zů
Rochlitz. mit dem Landt Pleÿssen. hainrich die Grafschafft zů Wittÿn. Vnnd Fridrich
die Grafschafft Brene. Vnnd darnach lies er alle dise benante seine
Sůn. alle die gůter die er zů dem gotlichen dinst hett geaÿgent besteten.
aůff das nach seinem abgang kaÿn Jrrůng derhalben mocht entspreyssen.
Welche gůter warn hůndert vnd achtzig hůfen Landts. Aůsgenůmmen was
von der einleÿbůng des Stiffts zů Nÿmick. Aůch darzů kam. Welchs warn
achtzig hůfen vnd ain halbe. ane die holtzer vnnd Weinberge. Darnach
ordent er das alleweg sein eldister Sůn. Ader sůst der Eldist seiner
erben ader nachkommen zůr zeit ein Schůtzherr des Closters aůff Sant
Petersberg sein solt. Vnd das sie alle daselbst beÿ ÿm solten begraben werden.

Als nůn Marggraff Cůnradt solchs alles aůffs ordenlichst bestelt hett.