Inn mitler zeit erfůr kaÿser karll das sich konig Wÿdekint vor
hasellmůndt zů feld gelegt hat. vnd genaÿgt wer mit ÿm zůstreiten
Derhalbenn er aůch zů ÿm růcket. vnd mit ÿm strÿt. Vnd als etlich
Cronicka habenn. hetten bede heer gleich glůck. vnd strÿten so lang bis
die nacht die schlacht entschaidt Aůch findt man dass
kaÿser karrll vnnd konig Wÿdekint sich dreÿ tag nacheinander
vor hasellmůndt mit eÿnander geslagenn haben. Vnnd so
hart das kaÿser karll nÿe kaÿn herter schlacht gethan hab.