Greuÿn von Ploÿsck, vonn welcher gebar er Teodoricům den Bischoff
zů Mersbůrg. mit aÿner tochter wie vorgesaget ist. Nůn hett der
Romisch kaÿser Fridrich an dem Pfingstag Nach Cristi gebůrt Taůsent
hůndert vnnd Im viervnndachtzigsten Jhar die Fůrstenn zů Meintz
beÿeinander. Da er seinen Sůn hainrich zů ainem Romischen konig
machet. Vnter andern fůrsten was aůch diser Marggraff Dittrich vnd
fiel daselbst in ain schwer kranckheit. Die er aůch Lang hett.
Vnd darnach an Sant Thomas abent kam er von Landtsberg in das Closter
des Lawternbergs. vnd wart in das Sÿchhaws der Brůder gefůrt. Da
ÿm aůch die kranckheit so schwer wart. das er nit weiter raissen
kůnt. vnd starb also in dem Monat Febrůari. Vnd wart daselbst
vonseinen brůdern begraben zů der rechten handt seines brůders
Graůenn Fridrichs vonn Brene.