Dahin Marggraff Ditterich des toten Marggraůen Cůnradts vater
mit seinen Brůdern Marggraff Otto vonn Meÿssen. Graůenn
Dedo vonn Rochlitz. Graúen hainrich von Wittÿn. vnnd Graůenn
Fridrich vonn Brene. sambt aller ÿrer Ritterschafft kamen. Die dem
ErtzBischoff vnd aller Priesterschafft mit weÿnenden aůgenn zů fůssen fieln
dem totenn gnad zůbitenn. vnd aůs dem bann zůhelffen. Vnd sagten
wie bestendiglichenn er nahe vor seinem endt einem Priester
gebeÿcht, absolůirt vnd des hailigen Sacraments begert hett. Dann in
seÿner kranckhait wart zů ÿm gebracht ein gaistlicher Priester
důrch beth seiner freůndt. den er bath ÿn beicht zůhoren. Vnnd
vonn dem bann zůabsolůirn. Dem er getrewlich verhies wo ÿm Got das
leben itzt gonnet. wolt er sich hinfůr vor solchem bann vnnd ferlichem
spil huttenn. Des zů ainem waren zaichenn gelobt er sich das Creůtz
anzůnemen. vnd wider die haÿden in das hailig Landt zůziehen. Als nůn
der Priester sah die zeichenn seÿnes rawigen hertzen. horet er
ÿn beÿcht. absoluirt ÿn vonn dem Bann. vnd gab ÿm das Crewtz
mit dem hailigenn warleichnam. Als nůn dise Fůrsten diss vor dem
ErtzBischoffe vnd der Priesterschafft sagten. was aůch gegenwertig
der gnant Priester, der dis aůs geschefft des ErtzBischoffs
mit dem aÿdt bestetigt. Nůn můsten dise Fůrsten dem ErtzBischoffe
verschweren. in ÿrenn Landen kaÿnn stechen zůgescheen lassenn. nach
selbst dareÿn zúreÿten. vnd ÿren dienern solchs aůch zůůerbiten.
Als sie das tethenn absolůirt er den totenn. vnd vergonnet
ÿm der weyhgrafft. Doch dem gewalt der Romischen kirchen an
schadenn. von deswegen aůch der tot můst so lang vnbegraben steen.
bis ainer seiner diener Werner genant gein Rom reÿt. vnnd die
volwort der Bebstlichenn hailickait darůber bracht. der aůch vor
seinen herrenn. zům hailigen grab zcog. vnd sich als ain getrewer
diener beweÿset Also wart entlich diser Marggraf Cůnradt.
aůff dem Lawternberg gegenn dem Nidergang vor dem eingang
der kirchenn begraben an dem Fůnffzehenden tag des Monats
Febrůarÿ Beÿ welchem aůch darnach der gedacht sein getrewer
diener Werner begraben wart. Vnnd zů seiner sele haÿl gab.
Marggraff Ditterich sein Vater Fůnffzehen hůff Lanndes.
zů Marggraůendorff dem Closter des Lawternbergs.