Deshalb er ainen artzt zü ÿm fordert. Aůff Das er sich aber leichtert.
vnd das schmer vonn ÿm brecht. lies er den baůch aufschneÿden
der feistickait ain tail heraůs zůnemen. Daran er aůch starb Nach cristi
gebůrt Taůsent hůndert vnnd Im Neůntzigsten Jar. vnd wart in dem
Closter Schÿlda erlichen begraben. Vnd an dem sÿbenzehenden
tag Septembris seiner sele zů haÿl wart gegeben ein hůff Lanndes dem
Closter Lawternberg. Vnnd aine fůr sein weÿb. Welches
man aůch aůs dem erkennen kan. Marggraff Dittrich von Lawsatz
ein brůder dises Graůen Dedo. hett etwan ÿnen ain Vorwerck
Groysck gnant beÿ Eÿlebůrg. aůff der Milde gelegen. Das er seÿner
Frawen kůngůndt vnd yrem Sůn herrenn Dittrich dem Bischoff zů Mersbůrg
geeÿgent hett dÿeweil sie lebten. Als er nůn starb gefiel
sein Landt an die baide brůder Marggraůen Otto zů Meÿssen. Vnd aůff
Graff Dedo vonn Rochlitz vnnd sein kinder. Vnd vber etlich zeit kaůfft
herr Walther Probst aůff dem Lawternberg das eegedacht Vorwerck von
herr Dittrich Bischoff zů Mersbůrg. wie vor benant ist. Aber die
gerechtickait vnnd eÿgenschafft můst er von den gnanten Fůrsten vmb
Sechzcick marck silbers bezalen. itzlichem Dreÿsig. An welchem
geldt doch ein itzlicher vmb Gotes willen. ÿres Vaters. Vnd yrer můter
sele zů haÿl zcehenn marck nach lies aůff das man zwů hůfenn.
anschrib zů ainem selgerethe. Aůch lies Marggraff Cůnradt
darnach aůch zweintzig Marck. dem Closter nach vmb Gotes willen Vnnd
seiner sele haÿl.