heer. vnnd enbot ÿm ein tag mit ÿm zustreiten. Als es aber aůff den abent
kam. reÿt der hertzog von Behem důrch die Oder. vnd zcog vber mit allem
seinem heer. aůff das er den Marggraůen mocht vnůersehen vberfallen.
Derhalben er von einem seiner Ritter der ÿn trewlich warnet das er
die gesetzt zeit des streits nit solt vbergehen. Wann es wer vntrewlich
gethan. vnd wůrd ÿm zůvneren raichen. Disen verachtet der hertzog
vnd sprach er forchtet sich vnd vermanet ÿn seines eÿds.
dem er antwort. Jch weis das ich mit zu ziehen verpflicht bin. Aber aús
vnrechter sach ewers bosen fůrnemens werd ich hinfůr an meÿner vaterlandt
nÿmmer sehen. Nůn hett der hertzog bey Im ein zewberin. die ÿn des Sigs
vergewisset. vnd gieng des zů vrkůndt vor dem heer. wasser in ainem Sib
tragendt. Das doch nit daraůs ran. Also der Marggraůe wiewol gewarnet
dem hertzogen entgegen zcog. ordent er sein spitzen. vnd traff menlichen
mit den Poln. bracht sie in dÿ flůcht. da von ersten die zewberÿn vnd
darnach der genante Ritter mit vil andern erschlagen wůrden. vnd wo
ÿm nit die nacht zů hilff kůmmen wer. wann es ser finster wart weren sie
alle tot blÿben. Doch ertrůncken ÿr vil in der Pfůtzen vnd in dem wasser an der flůcht.

Nach solcher sÿghafftigen slacht. kert der Marggraff wider. gewan das
Stetlein Lubůs mit dem Slos. Da er aůch alle rewber hencken lies. Vnd ist
gescheen nach cristi gebůrt Tawsent zweÿhůndert vnd Im Neůnden Jharr.