Hat aůch zwů tochter mit ÿr gehabt. Sophia vnnd Adela.

Sophia. wart gegeben hertzog Vlrich vonn Behem. Nach
welches tot sie wart ainem Graůen von Vobůrg Pfleger
zů Regensbůrg verhaÿrat.

Adela. wart gegebenn hertzog Ottockar vonn Behem. Welcher
mit ÿr erlangt ain Sůn Bredislaw. Vnd dreÿ tochterr
Vonn welchen aine ist vermahelt worden dem konig von Denemarck.
Die annder dem Graůen von Ortenberg. Vnd die drit ist wordenn
ein Closter Jůnckfraw zů Gernrode. da sie vil zeit von Irer hailickait
wegen wůnderzaichen gethan hat. Aber entlich ist benante
Fraw Adela vonn Irem herren von wegen der nahenden mogeschafft
geschaiden wordenn. Daůon man list In der andern Decretal
de testibůs die sich zů Lateÿn anhebet Constitůtis.

Vnnd nach dem Marggraff Otto der eldist vnter seinen brůdern war hett
er die Voÿteÿ vber den Lawternberg Innen. vnd beschirmet dasselbig
Closter getrewlichen vor allen feÿnden.