Dises Marggraůen Otto vonn Meÿssen vnglůck vnnd vnfal endet sich
damit nit. vnd was an gedachtem krieg vnd gefencknÿs vngesettigt.
Wann der bos geist ein ewiger vnnd listiger pflantzer aller
zwÿtrecht machet aůch vnaÿnickait zwischen ÿm. vnd seÿnem eldisten
Sůn Marggraůen Albrecht zů Meÿssen. Nemlich so hefftig vnd schwerlich
das Marggraff Albrecht hindan gesatzt aller gotlichen forcht vnnd
gebot. aůch geweldige handt an seinen Vater Marggraff Otto leget.
ÿn fieng vnd aůff dem Schlos Debin gefencklich setzet. Welcher
Irrůng. dise vrsach in Cronicken wirt befůnden. Marggraff Otto sein
Vater hett. disen Marggraff Albrecht sein eldisten Sůn. in seinem
letzten willen. zu ainem Marggraůen zu Meÿssen. vnd Dittrich seinen Jůngsten
Sůn zů ainem Graůen zů Weÿssenfels gesetzt. Vnd dittrich danebenn
vil ander sitze vnd gůter aůch zůgegeben. mit gnůgsamer versorgůng.