Weÿssenfels zůstundt seinem brůder vormals zůgering. hinfůr vil zů
starck wart. Wann da sein brůder Marggraff Albrecht von Meÿssen nach
verrůckůng wenig tag seinem brůder vnd seiner Stat Weÿssenfels
zů schadenn vnd nachtail nit fern daůon aůff dem Sibittinberg ein new
Slos bawet erhůb sich Graff Dittrich mit aller macht wider sein brůder
den Marggraůen, welchen er aůch schlůg vnd veriaget. Aůch den maisten
taÿl seiner ritterschafft schlůg. ander manschafft fieng ader erschlůg. vnd zcog also
mit solchem Sÿg frolich in seÿn Stat Weÿssenfels.

Darnach zcog diser Marggraff in das hailig Landt. Weÿl er Im hailigenn
Lanndt war. starb sein brůder Marggraff Albrecht von Meÿssen. wolt der
Romisch kaÿser hainrich desselben namen der Sechst. die Marck zů
Meÿssen fůr sich selbst behalten. Sůnderlich von wegen des Silber Ertzes
zů Freÿberg welchs die zeit ser wol stůndt. Derhalben aůch diser Romischer
kaÿser das Landt zů Meÿssen seinen aÿgen lewthen befalh zůůerwalden.