Als nůn dieser Graff Cůnradt Im dritten Jar nach seines brůders abgang
aůch starb. bevlis sich eegedachter Marggraff Dittrich von Meÿssen die
Vogteÿ vber Pegaw als ein rechter erb zůbekůmmen. Da ÿm aber der Abt
zů Pegaw solcher ere als vnbeqůem vnd vngeschickt darzů nit vergůnnet.
wart er aůs einem freůndt ein feÿndt. Vnd thet dem Apt vil widerstants
vnd schadens. Entlich befestet er die Stat Grotz aůff ÿn geerbet. vnd machet
da ein Marck zcol vnd Muntz. welchs er von dem Romischen kaÿser erwarb.
vnd gebot daraůff allenn seinen vntertanen. das ir kayner solt gein Pegaw
zciehen daselbst wider zůkaůffen nach zůůerkaůffen. Sůndern solche
hendel zů Groetz zůsůchenn.

Der Apt vonn Pegaw fůgt sich gein Rom zů der Bebstlichenn hailickait.
vnd beclaget sich. was ÿm vnleidlicher beschwerůng von dem Marggraůen
wer zůgefůgt Darůmb setzt ÿm der Babst zů Commissarien
vnnd richter den Bischoff. Dechant, vnd Schůlmaister ader
Scolaster zů Wÿrtzberg. Damit der Apt dem Marggraůen all sein fůrnemen