wolt ÿr kaÿnen fůr sein rat habenn. Dasselb thet ÿn wee. Derhalbenn sie
an sich zcogenn. soúil sie mochten vom Adell vnd andern. Vnd zuůor die sie
seines brůders getrewe diener vnd gůnner erkant hetten. machtenn ein
bůnt zůsammen. Vnd vermainten mit hůlff der vonn Leÿptzick diesenn
Marggraůen Dittrich důrch verretereÿ vmbzůbringen. Allein darůmb das er
an ÿr wissenn vnd Rat das Lanndt regirt. Derhalbenn sie
nach Cristi gebůrt zwelffhůndert vnd Im Fůnffzehenden Iar. etliche bewapente
verordenten mit beůelh das sie soltenn gegen Eÿsenberg, da diezeit
der Marggraff lag. zciehen. Welche also an Sant Niclas abent dahin
kamen. vnd gar fern in die nacht vor sein herberig kamen. Vnd klopfften an.
Vnd sie warnn alle entslaffenn in dem haws. aůsgenůmmen ain Iůnckfraw die
noch wachet. vnnd als sie het das klopffenn gehort. fraget sie was das spet
anklopffen bedewtet. vnd wer der wehr. Darauff sie antworten sie wern
des Fursten diener Darůmb begerten sie vonn ÿr sie einzůlassen. Dann sie
hetten etwas notlichs anzůtzaigen. Aber die maÿdt kert sich an ÿr
bitenn vnd vorgeben nichts. Sůndern nachdem sie antet das gegenwertig
vbel fůrnemen. verrÿgelt sie die thůr aůffs allervest. vnd lieff fůr des
Fůrsten Cammer. fragent ab sie die einlassenn solt. Daraůff der Marggraff,
wiewol er dergleichen ferlickait nit besorget. Doch sprach er es wirt baldt
tag werdenn. So kůnten sie die claÿne weil wol verziehen. vnd des tags.
erharren. Als nůn die bosswicht dise antwort enpfingen was ÿr hoffnůng
vnnd anschlag gar vergebens. Darůmb zcogenn sie des
morgens frw weg. vnd verbargen sich den tag in dem holtz. Inn maynůng auff
nechstfolgende nacht so sie mochtenn das vorgenůmmen vbel zůůerenden.
Aber der Marggraff zog denselben tag gein Camberg. vnd kam aůs diser
ferlickait vnnd vnsicherhait. Aber der gedachtenn abentewrer gesellenn
verhoffendt das ÿr genante gesellenn in kaÿn weg wůrden ablassenn.
sie hettenn dann den Marggraůen vmbgebracht. kamen gein Leÿptzick
vnd machten ain geschreÿ. als wehr der Marggraff beraÿt erschlagenn.
Vnnd sagtenn man solt die Stat der Marggraůÿnn, Vnd ÿrem Iůngenn Sůn
Marggraůen hainrich behalten vnd ÿn baÿdenn zů gůt bewaren. Derwegen ÿr
vil vom Adell, vnd aůch von denn frembden sich zůsammen schlůgenn.
Aber zůstůndt da solchen vbeln anschlag die getrewe diener vnd vnterthan
des Marggraůen erfůrn. erschrackenn sie ser. Vnnd hettenn
ein ser gros mitleÿden vnd betrůbnÿs, mitsambt dem gemeÿnen Folck.
vber den tot ÿres frůmmen herrenn.