Als aber dises Marggraůen feinden wart zůerkennenn gegeben. die
warheÿt. vnnd das er noch lebet. erschrackenn die zů Leiptzk
versammelt. vnnd brachten Vierhůndert pferdt zůsammen wurden abgesagte
feÿndt. Vnd theten dem Marggraůen vnnd seinen vnterthanen zweÿ
gantze Jhar vbergrossenn schaden. mit rawb vnd brant. Entlich
kam die sach zů tagenn. vnd nach manchfeltiger hanthabůng zwůngen
die feÿndt den Marggraůen zů ainer richtůng nach ÿrem gefallen.
Nemlich geredten die in der Stat Leÿptzk dem Marggraůen die
Stat wider dem Romischen kaÿser Otto. nach dem ErtzBischoff Otto.
nach andern seinen feÿnden. der er die zeit vil hett. einzůgebenn.
Also geredt yn der Marggraff ver zceÿhůng ÿrer vnthat. Vnnd
sicherhait ÿres lebens. Daraůff sie ÿm die Stat Leÿptzk
widerraúmten. Nach Cristi gebůrt zwelffhůndert vnnd Im
Achzehendenn Jharr.