in die herberig. Das weret so ůil vnnd so Lang bis alle herberig foll
warden. Weÿl aber die Bůrger Pflegtenn in aůflaůffen das Stůrmglockleÿn
zůslagenn lies der Marggraff dasselb heÿmlich abnemen. Darnach hett er
bestelt das. wenn man blies das ÿederman gerůst wer. vnnd das so dann die
Jenige die in den herbigen lagen ÿr wirt angriffen. vnd was sie von gůtern
in ÿrn hewsern fůnden. annemen. vnd die Stat also berawbten vnd blůnderten
Da es nů zu disem aůflaůff kam. wolt der gemeÿn man kaÿnem tail zůfallen.
Sůndern beÿder seiten gůnst behalten. vnd zů frid sein. Mann list
aůch die Marggreůische Rewtter haben ÿr wirt vil erstochenn. Vnd als der
Marggraff die Stat also gewůnnen hett. aůff das sich die Bůrger hinfůran
nit mer vngehorsams vnterstůnden. Lies er die mawrn gerings vmb nÿder
werffen. vnd bawet dareÿn dreÿ Schlosser. Das erst was in dem garten beÿ
den Pawlern. das ander beÿ den Parfússern. vnd das dritt do es noch
ist. Nůn wart verschafft das man die vrsacher dises kriegs sahen solt.
Vnter welchen aÿner den man am meÿsten sůchet verwappent das thor mit
ainer axt offent. vnd darůon kam. welchs brůder gefangen dem Romischen konig
geantwort wart. Vnnd darnach beÿ ÿm aůch genseÿt meers starb.

Wiewol nůn der Marggraff sich nach menschlicher wenůng gerochen hett.