hort doch das vbel das wider yn angefangenn was nit aůff Wann ander
Edelleůt stercker dann die erstenn. setzten sich wider ÿn. aůff ein
newes. vnd forderten hern Albrechten ErtzBischoůen von Magdebúrg in
das Lanndt mit gantzer macht. yn zůhelffen. der da ein meÿl wegs von
Leÿptzck das Schlos Tawch bawet. vnd das dorff dabeÿ gelegen vmbmawret.
Nach Cristi gebůrt zwelffhůndert vnnd Im Neůnzehenden Jharr.

Nůn mocht sich der Marggraff von diser feÿndtschafft in Vier Jharnn
nit entledigen. so lang bis ÿm dieselbenn feÿndt důrch sein aÿgen leibartzt.
dem sie hůndert marck verhÿessen. vnd Fůnfftzig daraůff gabenn.
Vergeben liessen. Also starb er důrch dieselbigenn gifft. Nůn fordert
der artzt die andern Fůnfftzig marck. zů dem sie Sprachen. Gee hinweg
dů vnseliger verreter. Wann dů dein aigen herren von gelds wegen getot hast